ఇన్నిటా నింతటా నిరవొకటే
వెన్నుని నామమే వేదంబాయే

నలినదళాక్షుని నామకీర్తనము
కలిగి లోకమున కలదొకటే
యిల నిదియే భజియింపగ పుణ్యులు
చెలగి తలప సంజీవని ఆయ

కోరిక నచ్యుత గోవిందా యని
ధీరులు తలపగ తెరువొకటే
ఘోర దురితహర గోవర్ధనధర
నారాయణ యని నమ్మగగలిగె

తిరువేంకటగిరి దేవుని నామము
ధరతలపగ నాధారమిదే
గరుడధ్వజుని సుఖప్రద నామము
నరులకెల్ల ప్రాణము తానాయ

సంకీర్త్య నారాయణ శబ్దమాత్రం విముక్త దుఃఖాస్సుఖినో భవన్తి అంటుంది విష్ణు సహస్రనామస్త్రోత్రం. అంటె కేవలం నారాయణ శబ్దం ఉచ్ఛరించిన మాత్రం చేతనే మన దుఃఖాలు, రోగాలు తొలగిపోతాయని అర్ధం! అట్టి వెన్నుని నామాన్ని వేదంగా స్వీకరించాడు అన్నమయ్య. ఈ యుగంలో మనందరికీ ఆశ్రయమైనది ఆ పద్మ పత్రాక్షుని నామమే. ఈ నామాన్ని కీర్తించే ఇంతకు మునుపు పుణ్యులు తరించారు. ధైర్యశాలులందరికీ మార్గమిది. పాపాలను పరిహరించే పావనమంత్రమిది! అదే తిరువేంకటగిరి దేవుని నామము! అని అంటున్నాడు మన అన్నమయ్య! ఆ పద కవితా పితామహుడు సంకీర్తనలలో అనుగ్రహించిన వేంకటేశ్వర నామ మంత్రాన్ని స్వీకరించి ముక్తులమవుదాం! పదండి ముందుకు ఆ నామాన్ని స్వీకరించడానికి!


ఇరవు = స్థానము;
సంజీవని = జీవము కలుగజేయునది;
ధీరులు = విద్వాంసులు, ధైర్యం కలవారు;
తెరవు = మార్గము;
గోవర్ధనధర = గోవర్ధన పర్వతాన్ని ధరించినవాడు (శ్రీకృష్ణుడు)