పచ్చని గరిక పారే సెలయేరు
విరిసిన పూవులు విహంగాల వింత ధ్వనులు
పరవశించె హృదయం పసిపాపనవ్వులా
తన్మయత్వానగానం
తరంగాలుగా కదిలె మలయసమీరాన కలిసి !
ఎంత హాయి ఇదిమాత్రమే జీవితమైతే !
ఇదే జీవనమైతే !
కాదుకాదంటున్నాయి
ఆకలిబతుకులు చాపిన చేతులు
భవితవ్యం కానరాని చూపులు నిండిన కన్నులు !
దిక్కులేని అనాధల దీనగాధలు
నాణానికి మరోవైపు చూడమంటున్నాయి !
ఆల్చిప్పలే అయినాయి కన్నులు ఆవైపు చూశాక
పారే సెలయేరు వారి కన్నీరులా కనిపించి
కరిగిపోయింది మనసు !
వాడిపోతున్నపూలు వారి బ్రతుకులే అనిపించి
విహంగాల ధ్వనులు వారి వీడ్కోలుగా తోచి
వారికై చేశాను ప్రార్ధనలు నేత్రాలు చెమరించి !
ప్రార్ధించే పెదవులకన్నా సాయపడే చేతులు మిన్నయని
తెలిశాక మరి ఆగలేక చేరువయ్యాను వారికి
చేయగల సాయాన్ని అందివ్వడానికి !
చిత్రమేమిటంటె అది నా గొప్ప కాదు
పరమాత్మ నా మనసున కలిగించిన స్పందన అది
ఆ పరమాత్మ నాకు చూపిన
సాటిలేని మేటి బాట అది !